الارشيف / أخبار المغرب / كود

علاش حركة عشرين فبراير ماجراتش وراها ...

  • 1/2
  • 2/2

سهام البارودي- كود

بزاف ديال الناس كايتسائلو علاش حركة عشرين فبراير فشلات !؟ وليدات لوفان فيفريي كاتقصحهم هاد الكلمة ديال ‘فشلات’ ماكايرضاوش بيها و كايعجبهم لي يقولهم ” كانت حركة ناجحة و برافو عليكم و حققتو انجزات و كدا” و حيت حنا فكوود ماشي فوزين كينطا kenta البومادا ديال الطياب ! فللأسف ماكانعرفوش ندهنو البومادا! غانقولو أنها حركة فاشلة ! ف ا ش ل ة !

نورمالمو عشرين فبراير كان خاصها تكون هي الحركة ديال “الشعب” و لكن المشكلة هي أنو الشعب ماعطاهاش وقت ! باش نفهمو كثر علاش الشعب نبذ عشرين فبراير و وليدات عشرين فبراير خاصنا نعرفو شكون هو هاد الشعب و كيفاش كايفكر حيت إذا عرف السبب بطل العجب !

بكل بساطة اليوم كاين ثلاتة د الانواع د المغاربة

كاين النوع الأول : دوك لي باغين يوقع الصداع و تنوض شي روينة على أمل تعاود التعازيلة (تضمس كارطة) و يطيحو فشي بول pool مقود ! هادو الأغلبية ديالهم الحلم ديالو هو تنوض الحرب و ينوض هو يهرف على شي فيلا بطوموبيلتها بماليها ب بيسينها بكانيش ديالها و يولي هو مول الدار بقوة السيف أو المقدة أو الكاطورزة ! و هاد الناس لحد الآن مايقدروش يتحركو حيت كايخافو من المخزن و لي شادهم و مطاكيهم هو المخزن، هاد الفئة نهار غاتنوض راه ماغاطالب لا بحرية لا بعدالة اجتماعية لا بمساواة  ! هاد الفئة غاتنوض دير قربالة  و يقدر بنادم يدخل عليك تال دارك و يحيد ليك الكوكوط و يقولك ” مالك ؟ ياك ثلاتين عام ونتا كاطيب بيها؟” و ديك الساعة سير شرح ليه نتا القانون و الملكية و الحقوق … باش يصيفطك تخيط سبعطاش لغرزة فموريزكو و لا السويسي !
النوع الثاني هوما هادوك لي هانيين ماعندهم علاش يوقع الصداع حيت لاباس عليهم بخيرهم و خميرهم و بالعكس مستاغلين العيشة فالمغرب كايجيهم فحال شي واحة … الفلوس موجودة و البزنس محرك و الشميشة و مراكش و اكادير و سبانيا جوج خطوات و هانتا مفرش فوطتك فكوسطا ديل صول كاضرب فشي كوكتيل sex on the beach !

النوع الثالت و لي هو الأكثرية الساحقة ،و هوما السبب المباشر لفشل حركة عشرين فبراير هوما المغاربة لي ماباغين صداع خدامين على راسهم في نظام و انتظام كي النمل و مآمنين بكلا ينشل على كبالتو و تفوتني و تجي فيما بغات و أغلبيتهم اسر متوسطة.
آش بغا المغربي ؟ ماشي شي حاجة كثيرة عارفين بلي الاستقرار ديالنا كايتقام رخيص و لكن الروينة تقدر تقام علينا غالية و غالية بزاف! حنا طالبين التعادل مع الوقت و مع المخزن اصلا ! “المغربي العادي ” le marocain moyen ! باغي غا فين يسكن ، و باش يخلص الدقايقية فالعرس، و فين يقري وليداتو و صافي و لا جات شي ضاسيا مازوط فين يجمع رجليه و يمشي يدوز خمسطاش اليوم د العطلة فمارتيل فالصيف و يجي مبرونزي و كايتقشر من نيفو راه بااااارااااكااا نحمدو ربي و نشكروه و نبوس إيدينا وش و ظهر ! الناس عاقو بلي خاصهم يدمرو على راسهم باش يهزو راسهم ! قليل لي معول على الدولة باش دير ليه شي حاجة هاد الوقت ! بنادم فهم بلي خاصو يتقاتل على راسو و على ولادو ،و لا وفرات ليه الدولة غا داك شوية د الأمن و لوطوروت و التران و موروكومول راه الله يجعل البركة ! هاد النوع ديال المواطنين الأذكياء كايشوفو الدولة فحال داك مول الصنك فالسواقات لي كايوفر للسواقة الأرض فين يفرشو سلعتهم و يبيعو ! و ديك الساعة كولا بياع و شراي يضارب على راسو باش يصور طرف د الخبز ! كاتلقا أسرة متوسطة مقاتلة مع الوقت والدين واحد و لا جوج وليدات و كايقريوهم فالبريفي حيت فهمو بيلا الدولة هزات يديها من التعليم !و ماغايبقاوش يبكيو و ينحطو على الدولة باش تقري ليهم ولادهم لي هوما لي ولدوهم ماشي الدولة!

اصلا حنا شعب قنوع ! داخل سوق راسو بالفطرة ! عندنا واحد الثقافة ديال “التمياك”! كانشوفو و كانميكو و هاااانية ، مادام كاينين الديور فالسكن الاقتصادي ب 25 مليون و معاهم كوزينة فابور راه ماعمر تنوض الثورة! و مادامت الضاسيا في متناول الجميع و الخبزة بربعة و عشرين ريال و باط ديال سيفيانا (سردين فاخر) بميادريال راه ماعندنا مانديرو بالثورة ! ديك النهار مشيت لمرجان نتقدا لقيت السردين ب10 الدراهم ! آه ! 10 الدراهم سردين جديد كايقشع … وا شبغينا داخلت عليكم بالله ؟ نوضو نضاربو  و نطايفو و نضحكو فينا الباشار على ود شوية ديال البراهش سخن عليهم راسهم !             طبعا لا ! و طبعا المغاربة اذكى من أن يتم التلاعب بعقولهم و استقرارهم ! و الحمد لله على نعمة السكن الاقتصادي و الضاسيا مازوط!

فهاماطور للأخبار والأنباء

تطبيق الاخبار على الجوال

كنت تقرأ خبر عن علاش حركة عشرين فبراير ماجراتش وراها ... في فهاماطور للأخبار والأنباء ونحيطكم علما بان محتوى هذا الخبر تم كتابته بواسطة محرري كود ولا يعبر اطلاقا عن وجهة نظر فهاماطور للأخبار والأنباء ، ويمكنك قراءة الخبر من المصدر الاساسي له من الرابط التالي كود مع اطيب التحيات.

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا