الارشيف / فن وثقافة / اليوم السابع

"حَلَمْبص" قصيدة جديدة للشاعر سعيد شحاتة

داخل مكشّر وضارب للخلايق بوز
الوشّ حقنة شرج والهيئه هيئة كوز
هيكل مرض نفسى ماشى وقام بدور جلوكوز
يلعن أبوها الغباوه ويحرق الطراطير
لمّا المدير فى البلد يطلع مدير أراجوز
......................
داخل مكشّر جنابه اسم الله دَخلِة بيه
طرطور محفلط وعامل نفسه أبصر إيه
شايل فى جيبه القلم وف إيده نص باتيه
وكأنه شاعر خديوى بجبّه وعمامه
وكإنّه كتلة دمامه وراكبه ع المعاتيه
......................
داخل مكشّر محشّر روحه قطن وشاش
هيكل مرض نفسى داخل غرفة الإنعاش
عاش اللى قال واللى ساكت واللى حطّ حباش
الخلطه خلطة "غباشي" وماشى أومباشي
بتّاوى مخدوع وفاكر روحه كيس جلّاش
......................
داخل مكشّر وضارب نص قدرة فول
دلدول وشايل فى إيده الشنطه للدلدول
سعران وداير يهلفط فى الكلام والقول
ويدوس على دماغ فلانه ويتهم فى فلان
ويجزّ فوق السنان ويقول: بقيت مسئول
....................
اسم المغامر "حَلَمْبص" والعمل أسطى
حضرة مدير المداير كالإله "باسطه"
عمّال ينوْنوْ إذا لزم الكلام تحابيش
وإن حبّ يدْعَك فانوسه بتِحْضَر الواسطه
....................
تسبيح رئيسه اليوماتى بياخده وِرد بوِرد
والعمر ضايع وشيش بيش والعتب ع النّرد
لو كان قرارك قرارك خد قرار ضدّي
وأكيد هتطلع حمار علشان هتسخط قرد
فهاماطور للأخبار والأنباء

تطبيق الاخبار على الجوال

كنت تقرأ خبر عن "حَلَمْبص" قصيدة جديدة للشاعر سعيد شحاتة في فهاماطور للأخبار والأنباء ونحيطكم علما بان محتوى هذا الخبر تم كتابته بواسطة محرري اليوم السابع ولا يعبر اطلاقا عن وجهة نظر فهاماطور للأخبار والأنباء ، ويمكنك قراءة الخبر من المصدر الاساسي له من الرابط التالي اليوم السابع مع اطيب التحيات.

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى